Hilfsnavigation

Rathausstraße
Maritim und sympathisch - einfach einladend

De groot Störmflood vör 110 Jahren


Vör genau 110 Jahren harr de Fröst in d’ Jannewaarmaant all Sloten, Depen un sogaar de Eemse mit ´n dicke Iisschicht overtrucken. Overall wurr schöfelt, wat dat Tüüg hull, van d’ 3. bit hen to d’ 24. Jannewaar. Man dann fung dat tomaal an to deien. Groot Scharen van Möwen kwammen binnenlands un man wuss, dat kunn wall Störm geven. Abers wat dann kwamm, daarmit harr kieneen rekent.

In de Nacht van d’ 27. up de 28. Jannewaar fung dat an to Störmen as man wat, un de Flood steeg un steeg. Heel besünners swaar wurr uns moi Stadt Leer van de Flood truffen. De Slüüs was noch neet klaar baut, so dat de Watermassen sünner uphollen to worden in de Leerder Straten un Husen strömen kunnen. De Flood kwamm mit Macht over de Lü. Dat slimmste was, dat mit dat Water ok groot Iispalten in d’ Stadt dreven wurren,  over d’ Peermarkt, dör d’ Neei Straat, de Kamp, de Kampstraat, de Königstraat, de Raadhuusstraat un d’ Oosterstraat. De Brunnenstraat keek as ´n lüttje Eiland daar tüsken rut. In disse Nacht was dat so pickerdüster, dat man de Hand vör Ogen neet sehn kunn. An Hülp was so haast neet to denken.

In de een of anner Huus wassen de Inwohners eerst upwakt, as dat Water al um hör Bedden umto swappen dee. De Nachtwächters harren hör neet up Tied over dat, wat up hör daal kwamm, wahrschaut, heetde dat nahderhand. Daar, waar de Straten wat deper laggen, keken de Lü mit schier Angst boven ut hör Dackfensters rut up dat Mallör um hör to. De Iispalten  schoven dör de Straten un reven sük an de Müren. Bült Husen drogen ´n groot Schaa daarvan un de neei Slüüs kreeg ok en good Slagg weg.

An anner Mörgen kunn man sehn, wat de Floot anricht hett. Bi d’ Gastwirtschaft Klock an d’ Peermarkt wassen söven Kohen verdrunken. An d’ Landstraat na Noort wassen dicke Bomen van de Iispalten eenfach dörsneden worden, en groot Schuppen van Firma Schumacher was d’r heel neet mehr. De Jödenkarkhoff was heel un dall verneelt, de Neeibau van de Weertsskupp „Ludwigslust“ van de Iismassen eenfach indrückt.

De Neei Straat un de Groninger Straat wassen heelmaal van Iisbülten overtrucken, un de Süderhammerk een Iisbahn mit riesengroot Iispalten, de umhoog stunnen. Groot Schaa gaff dat an all Husen. In de Connemannsche Fabrik stunn dat Water bit unner de Keddels in d’ Maschinenhuus. De Halvinsel Nesse kunn man unner de Iismassen garneet mehr utmaken. In een Huus, waar vör de Flood well stürven was, dreev de Sarg mit de Dood drin in de Dodenkamer umher.

In Noort stunn dat Water tiedwies twee Meter hoog. In d’ Bimger Diekgatt satt en Schipp up d’ Straat fast, in Bimm’ sülvst was en Huus binannersackt, un de Jemger Fährboot lagg bi Leer up Land.

So kunn man in een Tour wieder uptellen, wat domals all geböhrt is. Good, dat wi Leerders sowat siet 1903, as de Slüüs klaar worden is, neet mehr beleven mutten.

Störmfloten, de bit daarhen ok over Leer herfallen bünt:

1164 Julianenflood
1219 un 1267 Marcellusfloden
1287 Luciaflood
1331 Clemensflood
1362 Marcellusflood = große Manntränke
1374, 1509, 1511 Dionysiusfloden = Dullert un Jadebusen sünd do entstahn
1634 an d’ 10. Oktobermaant
1651 Petriflood
1715 Fastnachtsflood
1717 Wiehnachtsflood
1825 de groot Störmflood van d’ 3. up d’ 4. Feberwaar
1877, Jannewaar. Noort steiht unner Water
1883, 12. Dezember. Noort steiht al weer unner Water. Ok dat Stadthuus, mit all sien Akten daarin, hett Water ofkregen. Rund 150 Leerder Familjen verlesen all, wat se hebben, een Koopmann verdrinkt in sien Slaapkamer.
1887, 30./31. Jannewaar. Noort steiht unner Water.
1894, 22./23. Dezember. Dat Water steiht 2,70 m over NN. De Leerder Oltstadt is ofsopen..
1901, 27./28. Januar. Lesde groot Flood in Leer