Hilfsnavigation

Rathausstraße
Maritim und sympathisch - einfach einladend

Dör dat Jahr: Vörjahr un Paasken / Oostern


Vörjahr un Paasken , Oostern

Wat hett di dat `n Winter west! Ies un Sneei, Sneei un Ies – un dat over Maanten!

Man nu hett de „Fingerbieter“ sachs sien Kracht verloren. Dat Vörjahr is d`r weer. De Dagen worden langer un warmer. Mit leverlaa fangen de Planten an to spruten un to bleihen.
`s mörgens hört een weer de Vögels singen. Wenn de Sünn schient, komen ok de Tieken un de Immen vandag.

Bi lüttjen geiht dat nu up Paasken daal. Bold begünnt de stille Week. Elke Dag hett sien besünner Naam: de blaue Maandag, de gele Dingsdag, de witte Middeweek, de gröne Dönnerdag, de stille Fredag.

Denn kummt Husen-Busen Saterdag: an disse Dag worden Huus un Schür uprümt un schoon maakt; daarna Hicken-Bicken Sönndag: de Naam kummt van dat Eierbicken, en Kinnerspöl, waar twee Eier tegennanner hauen worden. De sien Ei heel blifft, dürt beid hollen.

Ostermaandag heet Eiertrüllen Maandag: ok weer na en Kinnerspöl. Hier laten Kinner Eier an d` Diek of an`n Wall daalrullen, un de sien Ei an wiedsten rullt, kriggt all de annern . Nu mutten de völe Eier ja ok maal eten worden, un so heet de Dingsdag na Paasken ok wall Upfreten Dingsdag.

Sodraa dat an d` Husen-Busen Saterdag dunkert, word haast in elke Loog of Stadt dat „Paaske in de Möte brannt“; overall steken nu de Lü dat Paaskefür an. Nahbers un Frünnen komen binanner, vertellen sük wat, un faaktieds gifft dat ok en bietje to eten un to drinken.

Zurück