Lüttje Jan telefoneert mit de Wiehnachtsmann

Hallo! Hallo! Wiehnachtsmann!
Büst du daar? Ja, hier is Jan.
Och, ik wull man evkes fragen,

bruukst du Hülp bi `t Sackendragen?

Moder see, in disse Jahr
kwammst du nich mehr. Is dat wahr?
Vader see, du kunnst neet lopen,
he wull sülvens man wat kopen.
Wiehnachtsmann, nee, dat was naar!

Lehn doch Vaders neje Kaar!
Of sall di uns Eilert halen?
Vader kann ´t Benzin betahlen.
Un dien Peerd? Dat blifft in d’ Stall.
Wat, dat geiht neet? Dat word mall?
Hett al Sinn an Kohl un Zucker?
Magg kien Autos mit Getucker?
Ja, wat maakt wi dann? Oh weh!...
Wat seggst du? Dat kummt up Stee?
Och, wat bün ik nu weer bliede!
Wiehnachtsmann, kumm bold un riede!

Greta Schoon

Van Verknobeln, Rullerkes un Speckendicken

Dat besünner Biwark an d’ Anfang un an d’ Enne van Dezembermaant

Nu is ´t weer sowiet! De Dagen worden immer körter, Iis glimmert up de Sloden un de Kinner könen de Tied haast neet mehr ofwachten, bit dat de Wiehnachtsmann kummt.

De Pepernöten un Moppen van Kipp-Kapp-Kögel-Lopen bünt meest up, dor steiht Sünnerklaas al vör de Döör. Stutenkeerls, Rider up Peerd un anner Sünnerklaasgood hett he för de leev Kinner mitbrocht, de för hum un sien Peerd en Teller mit Brot buten upsett hebben. (Of dat vandage ok noch so is?) – Mit disse Dag fangt för de Lüttjen de moiste Maant van d’ Jahr an.

An disse Avend, wenn de lüttje Kukels in d’ Bedde liggen un van de vullstoppt Stefel drömen, hört man overall in d’ Weertshusen, Backerejen un Koopladens en Gejuchter un Largen, dat sük en frömd Minske verwunnert fragen mutt, wat is daar geböhrt, wat geiht hier vör? - ´t is Verknobeln! „18 in de Baalje“ is anseggt, „mit is dood!“

Flees, Wursten, Torten, Sünnerklaasgood un mennig anner lecker Saken gifft´ to winnen. Nettakraat een of twee Euro düren insett worden, en „humaan“ Glücksspööl also, bi de kieneen sien Huus un Hoff verspölen kann.

Siet Jahr un Dag geiht dat s’avends an de 5. of 6. Dezember in lüttje un groot Logen rund! Mit Schisslaveng worden de Dobels in de iesdern Baalje smeten, de anners blot van d’ Slachter för Flees of Wursten bruukt word. Wenn daar de Dobels rinflegen, maakt dat `n Krach, dat `t en Pläseer is...

Na disse Avend geiht dat lös mit de „Geheimnisse“.

Ofsloten Dören, dat Backen van Wiehnachtskookjes, dat Basteln van Steerns, un dat anmalen van sülvst-söcht Walnöten maakt dat Wachten up Wiehnachten so moi. Wenn dann de lesd Döörke van d’ Wiehnachtskalenner open maakt worden is, de Lüchterkark full Minsken satt, de sük de Wiehnachtsgeschicht anhört un de lüttje Christkindje to ehren Leder sungen hebben, wenn de Geschenken utpackt worden sünd un de neei Puppke of Teddy al ´n paar Nachten mit in ´t Bedde slapen hebben, dann fangen Mama un Ootje an, de Rullerkes för ´t Neei Jahr to backen. Een heel Trumm vull is nix.

De zaart Geback hört bi elke Neeijahrsbesöök up d’ Teetafel, anners fehlt d’r wat! Stünn um Stünn smitt Moder en Slagg van de Mengsel in ´t Rullerkeiesder un Oma of Opa dreiht de dünn ofbacken Deeg gau over d’ Steel van ´n holten Röhrlepel. Wat deit dat smaals sehr an de Fingertippen! Man dat helpt nix, rund mutten se wesen, de Rullerkes, dat wassen se alltied al un daar geiht kien Weg an vörbi.

Un wenn de Rullerkes seker inpackt un verstoppt achtern in d’ Spieskamer stahn, dann geiht dat an d’ Olljahrsavend na d’ plattdütske Preken in d’ Kark an ´t Speckendickenbacken. Warm mutten de wesen, wenn man hör eten deit. Nettakraat ut d’ Pann of ut d’ Wafeliesder sullen se komen. Bi en lüttje Söpke un Neeijahrsbesöök geiht dat mit Speckendicken in ´t neei Jahr herin. De dicke Kopp sall sük bi disse Grundlaag an anner Dag dann wall in Grenzen hollen – so word ´t seggt! (mh)

Un so word dat maakt:

Speckendicken

1 ½ Pund Speckendickenmehl (van d’ Backer)

3 Eier
¾ Pund Rosinen
1 Püütje Anis
1 Püütje Cardamom
´n bietje Solt
½ Pund Botter (vörher uplösen)
1 Döös Sirup (ok in heet Water uplösen)
´n bietje Melk
Speck- un Mettwurstschieven

Speckendickenmehl mit de Sirup, Eier un Melk anröhren, bit dat en taaj Mengsel gifft. Rosinen, anis, Cardamom un Solt bigeven. Tolesd de Botter unnermengen un over Nacht setten laten.

Speck- un Mettwurstschieven in d’ Pann of Wafeliesder leggen. Mit ´n Sleef de Deeg dorover geven un de Speckendicken moi kross anbraden.
Un dann - Smakelk Eten!